Дарования Прикамья

Салтанова Анастасия Евгеньевна

«Сь

Литературное произведение о Пермском крае» на коми-пермяцком языке

Сьöлöмын дона горт

   Деревня, кöдаын ме ола, неыджыт, немöн не буржык мöдiк деревняэзся. Сія сулалö Кöсöгöр керöс вылын, сiйöн синöн туйö видзöтны горизонт дынöдз. Сыын етша достопримечательносттез. Деревня дынын эм неыджыт Коросаб пруд — медбур поздiсян места вöрпöткалö. Мед ни бур миян деревняын гортся подалö, ветлöтны оланiн гöгöрын, кытчö кокныс вешшö.

    Но сьöлöм пессьö сы понда, что отир деревняас лоисö етша. Том отир  мунöны каррезö. Сэтчин нылö буржык. А мый сэтчин бурыс? Морттэзлö сöстöм руыс оз тырмы, быдлаын шум, уна отир.  А менам деревняö кöть и учöтик, но сэтчин лöнь.  Неылын деревня дынсянь котöртö  юок Кыдзыс. Сэтöн эм и чери. Кöть кин вермас быд кадö пукалыштны берег дорын.

    Деревня гöгöр водöмась паськыт ыббез, кöдна жагöника тырöны том пуоккезöн, а ны увтын царствоыс рыжиккезлöн. Вöр менам деревняын отирöс вердö, шонтö и шогöттэзісь лечитö. Одзжык вöлi деревняын колхозыс  богатöй, а öнi  разьссис. Отирлö уджавны лоис некытöн, этасянь аймамлö  быдтыны да велöтны челядьöс öддьöн сьöкыт. Деревня визчисьö том оліссезсянь отсöт, медбы петны сьöкыт оланiсь. Карчйöр деревняын юрвердісь.

    Шоччисьны тожö колö. Миян эм клуб, кытöн том отир чулöтöны рыттэз.  Кöть менам деревняокö учöтик, но сыын олöны сьöлöма отир. Серафима Петровна получитiс званне «Отличник народного образования». Клавдия Петровна аслас удж понда получитiс  награда “Почётный работник  образования”. Иван Семёновичлöн эм правительственнöй грамота “Заслуженный работник сельского хозяйства”.  Григорий Николаевичлöн эм орден “Трудовой славы третьей степени”,  кöдö сiя получитiс совхозын уджавтöн. Мартынов Михаил Егорович уналö тöдса морт не только деревняас, но и быдсöн Коми-Пермяцкöй округ пасьта. Сы кипод увтын оссис Коса посадын май 18 лунö 2011 воö этнографическöй музей. Деревня гордитчö аслас земляккезöн. Менам эм пöрись баб, сійö шуöны Клавдия Егоровна. Сылö 90 год, аслас кузь оланöн бабö адззыліс уна сьöкыт кад. 14 годсянь бабö пондіс уджавны вöрын. Ыджыт уджалан стаж понда сійö пондісö лыддьыны тыллöн труженникöн. Бабöлöн мужикыс Иван Филипьевич вöлі война вылын. Гортö бертіс инавлидöн. Бабöлö öтнасыслö ковсис лэбтыны коккез вылö куим кагаöс. Öні миян деревняын эта морт ыджыт почётын, ме юавны сылісь верма, тöдны одзза мед олöм.

 Медыджыт керку менам  деревняын школа,  кытöн кылö челядь коласын коми-пермяцкöй кыв. Эм медпункт, челядьсад, спортзал да спортивнöй площадка, кытöн челядь  орсöны . Ась кöть туйез не асфальт пытшкын, но олiссезлö бур, что автобус ветлöтö тöв и гожум Перемö. И ме думайта, что менам чужанін оз веж ассис чужöм. Пыр деревняын лоас школа, кытöн челядь пондасö сильгыны –баитны мам кыв вылын. Надейтча, что деревня пондас быдтыны бур оитрöс: вынаэзöс, чожжезöс, бур сьöлöмаэзöс, кöдна  оз кольö умöльын ёртöс, нюжöтасö ки пöрисьлö.