Дарования Прикамья

Федосеев Маским Александрович

«Мед не адззывны сэсся сэтш

«Литературное произведение о Пермском крае» на коми-пермяцком языке

Мед не адззывны сэсся сэтшöм годдэсö

 1941-1945 годдэзö вöлі Великöй Отечественнöй война. Этö кадсö коми-пермяцкöй гижиссез мыччалöны асланыс произведеннёэзын. Тöдсöтны отирöс, кыдз Великöй Отечественнöй война коста овсис да уджассис коми-пермяцкöй отирлö да челядьлö, кыдз коми край отсалiс фронтлö судзöтны победа, кытшöм сьöкыт удж вöлi колхозниккезлöн. Эта годö ме велöтча 8 классын. Коми-пермяцкöй литература урок вылын велöтiм Каравевлiсь поэма «Кöр мунiс война». Ме решитi пантасьны Мартынова Вера Ивановнакöт, кöда олö д.Подъячевоын да юасьны, мый сiя тöдö эта кад йылiсь.

  Чужöм сiя 1933 годö апрель 8 лунö деревня Бажöвын. Семьяыс вöлöм ыджыт: куим сой да вон. Айсö война вылö абу босьтöмась. Сiя шогалöм, сылöн вöлöм ыджыт гöрб спина вылас. Но помнитö бура, кыдз босьтöмась война вылö вонсö. Вöлöм сiя сентябрь 2 лунö 1942 годö. Эта лунö Мартынова Вера Ивановна кайöм велöтчыны первöй классö. Öтлаын воныскöт мунöмась Сизёв деревняöдз. Классын пукавтöн видзöтöм öшынö, а кöр вöлöн подвода вöрзьöм, сiя нетшкöвтчöм парта сайись, котöртöм урок вылiсь ыбöс дынö, но сэтöн сiйö кутöмась, пуксьöтöмась бöр местаас. Велöтчöм военнöй годдэзö бура. Öтпырись военнöй кадö школаын велöтчытöн урок вылын сылiсь юалöмась: «Киннэз миян союзниккез?». Сiя ответитöма: «Англия да Америка». Сы понда сылö пуктöмась «отлично».

   Айыс сайсянь, сiдз кыдз сiйö абу нуöтлöмась война вылö, сы семьялö овсьöм буржыка. Айыс керлöм чöрссэз, нинкöммез. Мамыс ветлöтöм деревняэзöт нiйö вузавлöм. Эта деньга вылö нiя и олöмась.

   Военнöй кадö уджöтлöмась ёна челядьöс. Вера Ивановналö эта пораö вöлöм кыкьямыс год. Öтлаын мöдiк челядькöт сiя весöтлöм ёгись картошка, кольтаэз грудитлöм, анкытш коттьывлöм, но босьтны карманö абу лысьтöм, сiдз кыдз проверяйтлöм бригадир. Керöм удж нёджжавны, вовлöмась уна начальство, быдкодь уполномоченнöйыс, кöднаись челядь повлöмась.

   Арнас обоз вылö обоз нувлöмась сюсö заготзерноö. Отирлö сёйнны абу кольлалöмась. Фермаэзын мöссэсö чилькöтлöмась куимись: асывнас, луннас, рытнас. Ви керлöмась дояркаэз. Быд морт деревняись эна годдэзö ви сетлöмась государстволö. Быд керкуын вöлöм дупля. Сiйöн монöлтöмась нöк, медбы петiс ви, этö висö сетлöмась государстволö, а асьныс сёйлöмась перегон. Пекарняыс деревняас абу вöлöма, пöжавлöмась няньсö керкуэзын. Мамыс сылöн тожö пöжавлöм няньсö, сэсся нувлöм правленнёö, а сэтчинсянь сеталöмась отирлö. Военнöй кадö картошка ыббез ендывлöмась гарйытöг. Тулыс коста сэтшöм ыббесö юкавлöмась отир коласын. Кын картошкасö, сiсьсö отир öктывлöмась, а сэсся сiйö сейлöмась няньöн. Няньыс петавлöм кöра да чöскыт. Военнöй годдэзö уна сёйлöм быдкодь турунсö: урбöж, понкыв, сизьюр, шöмкор, кöчазь, пикан, кöктоин. Война вывсянь воныс гижлöм письмоэз. Мамыс Вера Ивановналö тшöктöм гижны öтпыр ответ, кыдз деревняын уджалöны да мый сёйöны. Гиж пö сiдз: сёям мийö понлiсь кыв,урыслiсь бöж, сизьлiсь юр, мед пö роччез думайтöны: бура олöны, яй сёйöны. Воныс сiйö письмосö пыр сьöрас кыскалöма.

    Похоронкаэз деревняас вовлöмась быд лун. Ох, и горзывлöмась деревняас. Отирыс еннэзнысö дöс печкаас сюйлöмась.

    Победа лун отирыс радöсь вöлöмась, но воныс сылöн сразу абу локтöма, кольöмась сiйö служитны действующöй армияö. Куим год бöртi только локтöма гортас.

    Вера Ивановна уськöтö тöдвылö и война бöрын медпервöй годдэсö. Нiя вöлöмась не кокнитжыкöсь. Ассис висьтасьöмсö кончайтö сэтшöм кыввезöн, медбы сэсся некöр не адззывны сэтшöм годдэсö.

   Кадыс перыта мунö одзлань, уна отир кулiсö ни, кöдна бы висьтасисö эта годдэз йылiсь, но оз ков вунöтны этö кадсö и колö том йöзыслö висьтавны, кыдз важ поколеннёыс шедтiс военнöй годдэзö победасö. Öнi Вера Ивановналö 84 год, олö нылыс дынын. Дак ась жö дыр эшö шыннялö сылöн чужöмыс, отсалö миянлö советтэзнас, быдтö внучеккезöс, кöдна сылöн даскык ни, олö эшö дырся-дыр, ась оз сетсьы некытшöм шогöттэзлö!