Хозяшева Карина Александровна

"Менам дона горт"

О своей малой родине, деревне Гаврукова

Менам дона горт

Талун ме мöда висьтасьны аслам горт йылiсь, кытöн ме чужи и быдма, кöдö бура радейта, донта.

Менам горт – деревня, кöдö йöзыс шуöны Гаврук, а гижсьö Гаврукова. Деревня миян нюжалöма неыджыт юок Сыви полöн. Сулалö керöсок вылын, öддьöн гажа местаын. Деревня гöгöр одзжык вöлiсö ыббез, видззез. Öнi нiя  жагöника тырöны вöрöн, кытöн гожумöн быдмö уна ягöд да тшак. Деревня конецас, керöс увтас, эм пруд. Сiя миян, кыдз рочöн шуöны,  достопримечательность. Гожумöн деревняись олiссез сэтöн шоччисьöны, гажöтчöны, купайтчöны, чери кыйöны, черива пуöны. Челядёккез орсöны, котрасьöны, ыджыттэз коласын гартчöны.

Прабабö меным висьтасьлiс, кыдз чужöм миян деревняным. Кöркö, öддьöн важын ни, вовлöма эта местаэзö Гаврил нима  морт. Гöгöр вöлöм вöр, кытöн олöма  уна вöрпи да вöрпöтка. Гленитчöм сылö местаыс, и тшупöм сiя  аслыс керкусö шорок дорö. Эм  кытiсь кайöтлыны ва да пеславны паськöм. Мый эшö колö? Гаврил нимсяняс и шуöмась миянлiсь деревнясö Гавруковонас.

Быдмöм жагöник деревняыс, ыджыт лоöм. Олöмась отир, быдыс уджалöма. Вöлöм кытöн уджавны. Колхозыс деревняаным строитлöма порсьферма, мельница, складдэз, вöв конюшня. Вöлöма и школа (начальнöй), и клуб, кытчö рыттэзнас öксьывлöм томпöлöс.

А öнi кольччис только öтiк магазин, кöда сулалö туй дорын да, бытьтö, гажтöмтчö важ олан понда. А эд эшö неважын, кöр айö быдмöм да велöтчöм, олöмась деревняас кык вося унажык морт. Джынысся унажык вöлöм челядь.

Талун Гавруканым олiссез етшаöсь. Челядьыс мийö кольччим дасöн.   Уна керкуэз киссьöмась, бок выланыс сулалöны и кыдз бы норасьöны миянлö асланыс олан вылö. Мыля сiдз лоис? Мыля деревня чинö, орö? А натьтö, сысянь, что öтiккез кулiсö, мöдiккез порисьмисö, томмез мунöны гортсиныс кошшыны кузь руббез. Вот кытшöм лоис миян деревняыс. Сiдз и орö жагöник. Зубыт этасянь сьöлöмлö.

Но ме öддьöн радейта ассим деревня. Кöр ме муна кытчöкö гортiсь öтiк-кык лун кежö, пыр гажтöмтча аслам горт понда, деревня понда, сiйöн и, натьтö, аркмис менам неыджыт кывбур:

                                       Деревня учöт менам, ась,

Но сiйö ме радейта стрась,

  Быд лун деревняын ме ола,

   А кытчö муна – гажтöм лоö!