Куксова Евгения Артемовна

Менам дона пельосок

сказка на коми-языке

Сказка «Дышоввезлöн увтыр»

Миян  Му вылын öддьöн уна деревняэз и быд деревня ассяма. Ассяма отирöн и ассяма вöр-ваöн. Öтiк деревняын олiс Дышоввезлöн увтыр. Фамиллёсянь ли, не ли, но быдöнныс нiя вöлiсö öддьöн дышöсь, а эд деревняын быдыс быдсö бура адззö да бура тöдö. Бурсö баитöны ны йылiсь, кин бура уджалö, кинлöн керкуын югыт, шоныт да сöстöм, уна картаын пода, карчйöрын - гырись карч, а пызан вылын - тырдоз. Эз позь этö висьтавны Дышоввез увтыр йылiсь.

Тулысöн да гожумöн отир керöны быдкодь уджжез ыббез да видззез вылын, карчйöррезын: гöрöны, пинялöны, кöдзöны, садитöны, киськалöны, весöтöны, ытшкисьöны, куртöны, медбы вöлi мый пуктыны пинь увтö не только морттэзлö, но и  картаэзын подалö. Арöн да тöлöн нiя дзимлялöны  карч, заптöны пес, вурöны да серöтöны паськöм,  гöрдззöны кеписсез да носкиэз, керöны и мöдкодь уна удж. Отир уджалö – отир и сёйö.

Только сёяныс абу Дышоввез семьяын. Медбöрья зоныслö айыс сетлiсö Дыш ним. Кöр сiя вöлi учöт, деревняас  ыджыт отир сiйö шувлiсö Дышокöн, а челядь нерлiсö: «Дыш, Дышок! Учöтик порсёк!» Зоночка горзiс курыт да сола синлаэзöн. Но локтiс колана кад, и учöтик зонок мунiс велöтчыны школаö и лоис Дышов Дыш. Медоддза лунсянь велöтiсь эз лэдз нерны этö зоночкасö, а тшöктiс сылö отсавны судзöтны бур знаннёэз. Лунiсь лунö, годiсь годö сiя старайтчис велöтчыны бура, уна лыддьöтiс небöггез. Уроккез бöрын орсiс öтöрын аслас классiсь ёрттэзкöт. Школаын  сiйö бура любитiсö  бур тöдöммез да кужöммез понда, небыт мывкыд понда. Школа кончитöм бöрсянь Дышов Дыш мунiс велöтчыны ыджыт Тöдöм нима карö. Велöтчис кокнита да бура и аслас деревняö бертiс Дышов Дыш Дышовичöн.

Том зонка уна вежöртiс велöтчикö, унаö велалiс. Сiя висьтасис аслас увтырлö ыджыт Тöдöм нима кар йылiсь, осьтiс нылiсь синнэз бур оланлö да висьталiс: «Бура уджалан – чöскыта сёян» да эшö содтiс: « Кин уджалö – сiя сёйö.»

Эта лунсянь Дышоввезлöн увтыр вежöртiс, кыдз колö овны миян Му вылын. Быдыс ны коласiсь пондiс бура уджавны. А Дышов Дыш Дышович висьталiс: «Öнi миян эм быдöс и ме верма вежны ассим фамиллёöс, нимöс да  айнимöс. Ыб вылын мийö вöдитам сю, а сысянь эм пизь, кытiсь позьö пöжавны быдкодь сёяннэз: нянь, блиннэз, пирöггез, чериняннез да эшö уна  мöдiкö. Ась Дышов фамиллё туйö лоö Блинов, эд блиннэз öддьöн чöскытöсь. Да  и комиöн и рочöн шусьöны öтмоза. Дыш ним лыддьöтам кö бöрöн , то  лоас менам виль ним Шыд, а эд этö тожö бур горись сёян. А öнi быдöннытö кора карчйöрö да сэтчин вежа ассим айнимöс. Дышович туйö лоа Калигович. Сiя эд тожö чöскыт колана отир понда сёян. А кытшöм чöскыт калиговöй каша! Тöдсасьыштамö быдöнныткöт. Öнi ме Блинов Шыд Калигович. Эта годсянь ме уджала колхозöн веськöтлiсьöн (председательöн)».

Быль ли эта? Вöт ли эта? Думайтö, лыддьöтiссез, асьныт. А ме думайта-   этö сказка, кöда   чужис  миян Коми – Пермяцкöй му вылын коми – пермяккез коласын да ветлöтö ыджыт Му пасьта. Ветлöтö сказкаыс деревняись деревняö, эд миян Му вылын, натьтö, эмöсь Блинов Шыд Калиговиччез, а Дышов Дыш Дышовиччез – абу.