Семериков Дмитрий Геннадьевич

"Мед оз кус деревняын би!"

Стихотворение

Мед оз кус деревняын би!

Миян дона коми крайын

Деревушка учӧт эм.

Мийӧ шуамӧ Нятяин,

Йӧз  шуӧ - Нятяино.

   Не совсем эшӧ  важын

Кыкдас  керку вӧлӧмась.

Ӧнì эта местаын

Кватя только кольччӧмась.

   Нёльсӧ мый ни сэтӧн лыддян?

Биыс ныын кусӧма.

Ӧтìк пӧрӧм, мӧдìк киссьӧм,

Куимӧт пӧлìньтчӧма.

   А нёльӧтìсь эта арӧ

Быд ӧшынсӧ дорисӧ.

Миян дынìсь ыджыт карӧ

Дӧс семьянас мунìсӧ.

   Кольччим ми  кык оланìн

Асланым деревняын.

Ӧддьӧн пола, чожа ми

Кольччам только ӧтнаным.

     Мый нӧ лоис сìдз оланас?

Школаэз пӧдналӧны!

-Отир етша, челядь абу! –

Юралìссез шуӧны.

     Кыдз нӧ пондам овны одзлань?

Деньга кытìсь шедтыны?

Айӧ шуис сэк миянлӧ:

-Огӧ пондӧ тӧждыны!

     Трактор эм, и муыс эм,

 Гӧрам да пинялямӧ.

Быдкодь сюсӧ мымда эм

Ыб вылас кояламӧ.

   Колям места карч понда,

Сэтчӧ жӧ садитамӧ.

Дозирайтам, убирайтам

Да джоджулӧ сюямӧ.

   Вӧрись, яг вылìсь ми тшак

Ӧктам, бура косьтамӧ.

Пуам суп, керам икра,

Тӧвнас - ОК! – чӧсмасямӧ!

   А ягӧд татӧн мымда!

Сёй тэ быдса содззезӧн!

Туримоль, морошка, чӧд

Ӧкты ыджыт доззэзӧн!

   Миян мошшез эмӧсь, пода!

Некӧр и гажтӧмтчыны.

Ми лӧсьӧтчим уна год кеж

Деревняаным кольччыны!

     А кин мыдзис овны карын,

Корам татчӧ овнытӧ!

Места уна. Тì быдлаын

Верматӧ строитчыны!

    Корам рочӧс и корам пермякӧс.

Лоам радӧсь быдӧннытлӧ ми.

Пондам овны ми ӧтлаӧн татӧн,

Мед оз кус деревняын би!